ਕਿਰਪਾਲ ਸਿੰਘ ਪੰਨੂੰ

ਮਾਤਾ ਪਿਤਾ: ਰਤਨ ਕੌਰ, ਪਰੇਮ ਸਿੰਘ

ਪਿੰਡ:  ਕਟਾਹਰੀ (ਨੇੜੇ ਰਾੜਾ ਸਾਹਿਬ ਗੁਰਦੁਆਰਾ), ਲੁੱਧਿਆਣਾ।

ਜਨਮ:  25 ਮਾਰਚ 1936

ਵਿੱਦਿਆ:  ਬੀ. ਏ. (ਅੰਗਰੇਜ਼ੀ ਸਾਹਿਤ, ਆਨਰਜ਼ ਪੰਜਾਬੀ), ਪੰਜਾਬੀ ਯੂਨੀਵਰਸਿਟੀ ਪਟਿਆਲਾ

ਜੀਵਨ ਪੰਧ:
1958 ਵਿੱਚ ਹਾਕੀ ਦੇ ਸਿਰ ਉੱਤੇ ਪੁਲਿਸ ਵਿੱਚ ਸਿਲੈਕਸ਼ਨ ਗਰੇਡ ਸਿਪਾਹੀ ਭਰਤੀ ਹੋਇਆ ਅਤੇ 1988 ਵਿੱਚ ਬਤੌਰ ਇੱਕ ਡਿਪਟੀ ਕਮਾਂਡੈੰਟ ਸੇਵਾ ਮੁਕਤ ਹੋਇਆ। ਇਸ ਵਿੱਚ ਦੋ ਕੁ ਸਾਲ ਬਟਾਲੀਅਨ ਸੈਕਿੰਡ-ਇਨ-ਕਮਾਂਡ ਵੀ ਰਿਹਾ। ਇਸੇ ਸਾਲ ਮੁਹਾਲੀ ਆ ਕੇ ਜੰਗਲ਼ ਦੇ ਜੀਵਨ ਨਾਲ਼ੋਂ ਟੁੱਟਕੇ ਮੁੜ ਸਾਹਿਤਕ ਜੀਵਨ ਨਾਲ਼ ਜੁੜਿਆ ਅਤੇ ਮੁਹਾਲੀ ਤੇ ਚੰਡੀਗੜ੍ਹ ਦੀਆਂ ਸਾਹਿਤਕ ਮਿਲਣੀਆਂ ਦਾ ਆਨੰਦ ਮਾਣਿਆਂ। 1991 ਵਿੱਚ ਕੈਨੇਡਾ ਗਿਆ।

ਘਰ ਵਿੱਚ ਕੰਪਿਊਟਰੀ ਵਾਤਾਵਰਨ ਸੀ/ਹੈ। ਪੰਜਾਬੀ ਕਲਮਾਂ ਦਾ ਕਾਫਲਾ ਹੋਂਦ ਵਿੱਚ ਆਇਆ ਤੇ ਉਸ ਨਾਲ਼ ਜੁੜ ਗਿਆ। ਟੋਰਾਂਟੋ ਤੋਂ ਨਿੱਕਲ਼ ਦੇ 'ਹਮਦਰਦ', 'ਪੰਜ ਪਾਣੀ' ਆਦਿ ਹਫਤਾਵਾਰ ਪੰਜਾਬੀ ਅਖ਼ਬਾਰਾਂ ਨਾਲ਼ ਜੁੜ ਕੇ ਕਾਲਮ ਲਿਖਣ ਲੱਗਾ। ਪੰਜਾਬੀ ਟਾਈਪ ਸਿੱਖਣ ਅਤੇ ਕੰਪਿਊਟਰ ਉੱਤੇ ਕੰਮ ਕਰਨ ਦੀ ਲੋੜ ਪਈ, 'ਜਿੱਥੇ ਚਾਹ ਉੱਥੇ ਰਾਹ' ਅਨੁਸਾਰ ਸਮੇਂ ਨਾਲ਼ ਸਭ ਕੁੱਝ ਆ ਗਿਆ।

"ਪੰਜਾਬੀ ਕਲਮਾਂ ਦੇ ਕਾਫਲਾ" ਰਾਹੀਂ ਹੀ ਗੁਰਮੁਖੀ ਫੌਂਟ 'ਸਮਤੋਲ' ਨੂੰ 'ਬਾਬਾ ਫਰੀਦ' ਸ਼ਾਹਮੁਖ਼ੀ ਫੌਂਟ ਵਿੱਚ ਲਿੱਪੀਆਂਤਰ ਕੀਤਾ। ਇਸ ਕਾਰਜ ਲਈ 'ਬਾਬਾ ਫਰੀਦ' ਸ਼ਾਹਮੁਖੀ ਫੌਂਟ ਗੁਰਮੁਖੀ ਫੌਂਟ 'ਸਮਤੋਲ' ਦੇ ਸਮਾਨਤਰ ਤਿਆਰ ਕੀਤੀ। ਫਿਰ ਇਕਬਾਲ ਕੈਸਰ (ਲਾਹੌਰ) ਦੇ ਉਤਸ਼ਾਹ ਨਾਲ਼ ਇਨਪੇਜ਼ ਤੋਂ ਗੁਰਮੁਖੀ ਫੌਂਟ ਪਰੀਵਰਤਨ 1998-1999 ਵਿੱਚ ਕੀਤਾ। ਜਿਸ ਦਾ ਦਿਖਾਵਾ ਪੰਜਾਬ ਸਟੇਟ ਟੈੱਕਸਟ ਬੁੱਕ ਚੰਡੀਗੜ੍ਹ ਅਤੇ ਪੰਜਾਬੀ ਯੂਨੀਵਰਸਿਟੀ ਵਿੱਚ ਡਾਕਟਰ ਜੋਸੀ ਆਦਿ ਕੋਲ਼ ਕੀਤਾ।

ਅੱਜ ਕੱਲ੍ਹ ਪੰਜਾਬੀ ਕੰਪਿਊਟਰ ਦੀਆਂ ਸਮੱਸਿਆਵਾਂ ਅਤੇ ਪਰਾਪਤੀਆਂ ਦੇ ਅੰਗ ਸੰਗ ਹੋ ਕੇ ਉਨ੍ਹਾਂ ਨਾਲ਼ ਮੋਹ ਪਾਲ਼ ਰਿਹਾ ਹਾਂ। ਹੁਣ ਸੇਵਾ ਮੁਕਤ ਜੀਵਨ ਵਿੱਚ ਇਹੋ ਸ਼ੌਕ ਹੀ ਜਗਤ ਦੇ ਦਾਇਆ ਦਾਈ ਦੇ ਆਪਣੇ ਹਿੱਸੇ ਆਏ ਸਮੇਂ ਨੂੰ ਅਨੰਦਤ ਕਰ ਰਿਹਾ ਹੈ।

ਖਾਸ ਗੁਣ: ਹਰ ਨਵੇਂ ਕੰਮ ਨੂੰ ਹੱਥ ਪਾ ਲੈਣਾ ਤੇ ਉਸ ਦੇ ਮਾਰਗਾਂ ਦੀ ਨਿਸ਼ਾਨ ਦੇਹੀ ਕਰਨੀ, ਫਿਰ ਸਾਰੀ ਸਮਰੱਥਾ ਉਸੇ ਵਿੱਚ ਝੋਕ ਕੇ ਮਾਣ ਯੋਗ ਅਤੇ ਮਾਨਣ ਯੋਗ ਸਫਲਤਾ ਪਰਾਪਤ ਕਰਨੀ। ਜਿਨ੍ਹਾਂ ਵਿੱਚੋਂ ਕਈ ਵੇਰ ਕਰਾਮਾਤੀ ਨਤੀਜੇ ਵੀ ਪਰਾਪਤ ਹੋਏ। ਇਹੋ ਗੁਣ ਹਰ ਔਖੇ ਸੌਖੇ ਸਮੇਂ ਸਹਾਈ ਹੋਇਆ। ਜਿਸ ਨੇ ਸਮੇਂ ਸਮੇਂ ਪਰਦੇ ਵੀ ਕੱਜੇ ਅਤੇ ਤਰੱਕੀਆਂ ਵੀ ਦਿੱਤੀਆਂ।

ਇੱਛਾ:  ਮਾਂ ਬੋਲੀ ਹਰ ਖੇਤਰ ਵਿੱਚ ਵਧੇ ਫੁੱਲੇ ਅਤੇ ਇਸ ਦੀ ਹਰ ਮੈਦਾਨ ਫਤਿਹ ਹੋਵੇ।